GS1 Azerbaijan Cəmiyyətinin əməkdaşları respublikanın cənub bölgəsində seminarlar keçirib

Azərbaycan Respublikasının Kiçik və Orta Biznesin İnkişafı Agentliyinin (KOBİA) dəstəyi ilə GS1 Azerbaijan Cəmiyyətinin əməkdaşları 10-11 mart 2022-ci il tarixlərində Cənub bölgəsində “GS1 sistemi və ştrixkodların ixracatda rolu, Avtomatik identifikasiya texnologiyalarının əhəmiyyəti” mövzusunda seminar təşkil etmişdir. Seminar Cəlilabad, Masallı, Lənkəran və Astara rayonlarında baş tutmuşdur və burada istehsalçılar, xidmət sahəsindən olan müəssisələr, otel nümayəndələri və s. iştirak etmişdir. Seminar zamanı GS1 Azerbaijan Cəmiyyətinin Əmtəə Nömrələmə Depozitariyası müdiri G.Rəsulova GS1 sistemi haqqında ümumi məlumat verərək ştrixkodların gündəlik həyatda və xüsusilə ixracatda rolu barədə məlumat vermiş, istehsalçıların xüsusilə Rusiya bazarına çıxış zamanı ştrixkodla bağlı diqqət etməli olduqları məqamları vurğulamışdır. Daha sonra isə Cəmiyyətin Layihələr rəhbəri S.Rzayeva və IT bölməsinin rəhbəri F.Abbasov ştrixkod vasitəsilə uçot, inventarizasiya prosesinin aparılması barədə danışmış, həmçinin əyani vasitələrlə nümayiş etdirmişlər. Seminar iştirakçılar tərəfindən maraqla qarşılanmış, yaranmış bir sıra suallar cavablandırılmışdır.