14.02.2025-ci il tarixində GS1 Azerbaijan İctimai Birliyi tərəfindən yeni üzvlər üçün müntəzəm seminar-təqdimatlardan növbəti biri təşkil edildi. Tədbirdə 20-dən çox sahibkarın iştirakı baş tutdu. Onların arasında əczaçılıq məhsulları istehsalçısı  “Referans Pharmaceuticals” MMC, kimyəvi məhsulların istehsalçısı “Modern Homm” MMC, qida məhsulları istehsalçısı “Zəngəzurlu” MMC və digər hüquqi şəxs və fərdi sahibkarları qeyd etmək olar. 
Tədbir GS1 Azerbaijan İctimai Birliyinin İdarə Heyətinin sədri V.Əliyevin çıxışı və iştirakçılara giriş sözü ilə başladı.
Daha sonra Əmtəə Nömrələmə Depozitariyası müdiri G.Rəsulova GS1 sistemi, ştrixkodların gündəlik həyatda rolu, o cümlədən GS1 beynəlxalq təşkilatının standartlarının əsas tələbləri - GTIN nömrələrinin verilməsi qaydaları, onların tərtib edilməsinə dair tələblər, məhsulun qablaşdırılmasında istifadəsi, standart ölçüləri və s. haqqında məlumat verən təqdimatla çıxış etdi.
Birliyin Layihələr üzrə rəhbəri H.Cəfərova sahibkarlara müasir GS1 standartlarından istifadə edən texnologiyaların inkişafı və təkmilləşdirilməsinə kömək etmək məqsədilə GS1 Azerbaijan tərəfindən keçirilən təlim kursları haqqında təqdimatla çıxış etdi.
Avtomatik identifikasiya sahəsi üzrə aparıcı mütəxəssis F.Abasov “GS1 Aze Barcode” mobil tətbiqinin yenilənmiş versiyası haqqında danışdı, onun köməyi ilə həm yerli mallar, onların istehsalçıları, həm də xarici mallar haqqında məlumat əldə etməyin mümkünlüyünü bildirdi. Tətbiq vasitəsilə nəinki 1D kodları, eləcə də 2D kodları (QR kod, DataMatrix) asanlıqla oxumaq olur ki, bu da yeni nəsil ştrixkodlara keçid dövründə atılmış önəmli addımlardan biridir. 
Seminarda müzakirə olunan mövzuların mənimsənilməsini yoxlamaq məqsədilə bütün seminar iştirakçılarına qısa sınaq təklif olunub. GS1 Azerbaijan Əmtəə Nömrələmə Depozitariyasının mütəxəssisi S.Rəhimova iştirakçılar arasında test sorğusu keçirdi.
Tədbirin sonunda GS1 Azerbaijanın yeni üzvlərinə GS1 sistemində qeydiyyatdan keçdiklərini təsdiq edən Şəhadətnamələr təqdim edildi, təlimat və metodiki vəsaitlər paylanıldı, xatirə şəkilləri çəkildi.
Tədbirə Azərbaycan Respublikasının Qida Təhlükəsizliyi Agentliyinin (AQTA), Kiçik və Orta Biznesin İnkişafı Agentliyinin (KOBİA), İqtisadi İslahatların Təhlili və Kommunikasiya Mərkəzinin (İİTKM), Azərbaycan Respublikasının İxracın və İnvestisiyaların Təşviqi Agentliyinin (Azpromo) nümayəndələri dəvət olunmuş və iştirak etmişlər.