GS1 Baş Assambleyası 19-22 may 2025-ci il tarixlərində Hindistanın Mumbay şəhərində keçirilib. Tədbirdə 104 ölkədən 300-dən çox nümayəndə, idarə heyəti üzvləri və qonaqlar iştirak edib.

 Müzakirə üçün əsas mövzular:
* Vision 2030-un qəbul edilməsi və onun müxtəlif sənaye sahələrinə təsiri;
* Ambition 2027 və yeni nəsil barkodlara qlobal keçid;
* AI və blockchain kimi yeni texnologiyaların transformativ təsiri.

Tədbirdə bir sıra Hindistan şirkətlərinin nümayəndələri öz iş təcrübələrindən danışıblar. GS1 Baş Assambleyasının plenar iclasında GS1-in prezidenti və baş icraçı direktoru Renaud de Barbuat təşkilatın fəaliyyəti və gələcək planları haqqında hesabat təqdim edib. Tədbirdə GS1 İdarə Heyətinin iclası, Dizayn Düşüncəsi və Transformasiya üzrə panel sessiyası, GS1 Vision 2030 qlobal strategiyasının həyata keçirilməsi ilə bağlı müxtəlif sənayelərdə problemlərin müəyyən edilməsi üçün xüsusi təqdimatlar və işgüzar görüşlər keçirilib. Bir sıra milli təşkilatların rəhbərləri – GS1 üzvləri yeni layihələri və iş sahələri haqqında məlumat veriblər.

GS1 İdarə Heyətinə yeni üzvlər seçilib və iki yeni ölkə, GS1 Laos və GS1 Kosovo GS1 Assosiasiyasına qəbul edilib. Ənənəvi olaraq GS1 təşkilatında üzvlüyünün 5 ildən 50 illiyinə qədər yubileyini qeyd edən milli təşkilatlar təbrik edilib.

Baş Assambleya hər il GS1 üzvü olan ölkələrdən birində keçirilir. Assambleyada GS1 Azerbaijan İctimai Birliyinin əməkdaşları, icraçı direktor S.Əliyeva və depozitariya müdiri G.Rəsulova iştirak ediblər.