22.10.2025 – ci il tarixində GS1 Azerbaijan və Azpromo əməkdaşları arasında işgüzar görüş keçirilib. Görüşdə Birliyinin İdarə Heyətinin Sədri V.L.Əliyev, icraçı direktor S.Əliyeva, Depozitariya müdiri G.Rəsulova, Azpromo əməkdaşlarından isə İxracın təşviqi Deportamentinin direktoru F.Fərzəliyev və ixracatçılarla iş şöbəsinin böyük mütəxəssisi O. Mustafayev iştirak edib.

Görüş zamanı GS1 sisteminin 1D kodlardan QR kodlara keçidi (2D kodlar) hədəflədiyi, bu kodların üstünlükləri, bu  keçid üçün GS1 Azerbaijan tərəfindən atılan addımlar vurğulanıb. Yeni təqdim olunan GS1 Digital Link servisi və bu servisin ilk yerli istifadəçilərinin nümunə məhsulları nümayiş etdirilib. Həmçinin bildirilib ki, bu kodlar məhsulun harada, nə qədər skan edildiyini göstərmək imkanı verir ki, bu da Azpromo tərəfindən təşkil edilən sərgilər üçün mühüm və çoxşaxəli faydalar yaradır. Belə ki, bu məlumatlar vasitəsilə:

· Ziyarətçi marağı analizi aparmaq, hansı məhsulların və brendlərin daha çox diqqət çəkdiyini müəyyənləşdirmək mümkündür;

· İxrac potensialı yüksək olan məhsullar barədə real vaxtda məlumat toplanır, bu da sonrakı təşviq və dəstək tədbirlərinin planlaşdırılmasına kömək edir;

· Rəqəmsal izlənmə sayəsində sərgidə təqdim olunan məhsulların beynəlxalq alıcılar tərəfindən hansı regionlardan skan edildiyi izlənə bilər, beləliklə hədəf bazarların seçimi daha dəqiq olur;

Beləliklə, GS1 Digital Link texnologiyası sərgilərdə yalnız məhsulların tanıtımı üçün deyil, həm də rəqəmsal analitika və bazaryönümlü qərarların qəbulu üçün strateji alət kimi çıxış edir.

Azpromo əməkdaşları yeni kodlarla yaxından maraqlanıb və bu kodların tətbiqi üçün öz növbələrində müvafiq təbliğatların aparılacağını bildirib.