25 iyun 2026-cı il tarixində GS1 Azerbaijan İctimai Birliyi GS1 Brazil nümayəndələri — Flávia Ponte Costa və Ricardo Aranha ilə pərakəndə ticarətdə izləniləbilmə proseslərinin təkmilləşdirilməsi məqsədilə GS1 QR Code tətbiqinə həsr olunmuş onlayn görüş keçirib.

Görüş zamanı GS1 Brazil mütəxəssisləri pərakəndə ticarətdə GS1 QR Code-un uğurlu tətbiqi təcrübəsini təqdim edərək, onun məhsulların izlənilə bilməsinin təmin edilməsi, yararlılıq müddətlərinə nəzarət və itkilərin azaldılması sahəsində yaratdığı imkanları nümayiş etdiriblər. Xüsusi diqqət texnologiyanın Braziliyada praktik tətbiq təcrübəsinə, eləcə də onun digər bazarlarda tətbiqi perspektivlərinə yönəldilib.

Görüşdə GS1 Azerbaijan-ın Baş direktoru Vəfa Əliyev və təşkilatın əməkdaşları, həmçinin Azərbaycan Respublikasının Qida Təhlükəsizliyi Agentliyinin və «OVA» supermarketlər şəbəkəsinin nümayəndələri iştirak ediblər.

İştirakçılar GS1 Brazil təcrübəsinin Azərbaycanda tətbiqi imkanlarını müzakirə edib və gələcək əməkdaşlığın perspektivlərini nəzərdən keçiriblər.