20 iyun 2023- cü il tarixdə “Qlobal Standart 1 Beynəlxalq Sisteminin Təbliği” İctimai Birliyi tərəfindən İctimai Birliyə yeni üzv olmuş yerli istehsalçılar üçün növbəti seminar prezentasiya təşkil edilmişdir. Seminar – prezentasiyada müxtəlif istehlak məhsulları istehsal edən müəssisələrin və fərdi sahibkarların nümayəndələri iştirak etmişdir.

Seminar – prezentasiya Birliyin İcraçı direktoru Səbinə Əliyevanın çıxışı ilə başlamışdır. Əmtəə Depozitariyası müdiri Gülanə Rəsulova GS1 sistemi haqqında ümumi məlumat verərək ştrixkodların gündəlik həyatdakı rolu, o cümlədən GS1 beynəlxalq təşkilatının standartlarının əsas tələbləri haqqında - GTIN- lərin paylanması qaydaları, onların tərtib edilməsinə dair tələblər, qablaşdırmada tətbiqi, standart ölçüləri haqqında məlumat vermişdir. Məhsulun etiketinin formalaşdırılmasına dair tələblər ətraflı nəzərdən keçirilmiş, ştrixkodlarla işləyərkən dizaynerlərin yol verdikləri tipik səhvlərə xüsusi diqqət yetirilmişdir. Seminar - prezentasiyada milyonlarla GTIN haqqında məlumatları özündə cəmləşdirən GEPIR beynəlxalq axtarış sisteminin imkanlarından danışılmışdır. Eyni zamanda ştrixkod vasitəsilə uçot, inventarizasiya prosesinin aparılması barədə danışılmış, həmçinin əyani vasitələrlə nümayiş etdirmişlər.Daha sonra isə mobil telefonlardan istifadə etməklə yerli mallar və onların istehsalçıları haqqında məlumat əldə etməyə imkan verən “GS1 Azerbaijan AZE Barcode” mobil tətbiqin istifadə imkanlarından bəhs edilmişdir. Əhatə olunan məsələləri möhkəmləndirmək məqsədilə iştirakçılar arasında testlər üzərindən sual-cavab olunaraq yenidən müzakirə olunmuşdur. Bu isə iştirakçılar tərəfindən maraqla qarşılanmışdır.

Sonda isə Birliyin İcraçı direktoru Səbinə Əliyeva tərəfindən yeni üzv- istifadəçilərə GS1 Beynəlxalq Sistemində qeydiyyatdan keçdiklərini təsdiq edən sənəd - Şəhadətnamə təqdim edilib.