Beynəlxalq GS1 assosiasiyasının növbəti illik Qlobal forumu 22-26 fevral 2016-cı il tarixlərində Brüsseldə baş tutub. Tədbirdə rekord sayda nümayəndə – 89 ölkədən 760  nəfər iştirak edib.
Tədbir çərçivəsində 6 plenar sessiya, 45 iclas, işçi qrupların təlim seminarları və iclasları, habelə ənənəvi Market Place sərgisi keçirilib. 
GS1-in Prezidenti M.Loper forumun açılışındakı çıxışında 2015-ci ilin əsas nailiyyətləri arasında məlumatların keyfiyyətinin artırılması sahəsində tərəqqini (GS1 Source layihəsi), GS1 Standartlarının gələcəkdə internet-ticarət (UniqueİD, GS1 SmartSearch və GS1 Key Authentication layihələri) və səhiyyə (Unique Device Identification və Project Imagine layihələri) sahələrinə irəliləməsini qeyd edib. 
Walmart, Macy’s, Carrefour, Google, Nestle, Procter&Gambler və s. bir sıra ən iri qlobal şirkətlərin nümayəndələrinin çıxışlarında müasir iqtisadiyyatda GS1 Standartlarının xüsusi əhəmiyyəti və biznes qarşısında yaranan vəzifələrin təmin edilməsində əsas rolu vurğulanmışdır. Bu proseslər təkcə GS1 üçün ənənəvi olan geniş istehlak malları sahəsinə toxunmur, həm də səhiyyə, ictimai iaşə, nəqliyyat və logistika, bank biznesi, kənd təsərrüfatı və s. sahələrdə  özünü daha aktiv göstərir.
GS1-in bu proseslərdə rolu vahid qlobal standartların və həllərin təqdim edilməsindən, onların milli və regional səviyyələrdə tətbiqinə hərtərəfli dəstəyin təmin olunmasından və təchizat silsiləsinin bütün iştirakçıları arasında qarşılıqlı əlaqə üçün şəraitin yaradılmasından ibarətdir.
Beynəlxalq GS1 assosiasiyasının 2016-cı ildə fəaliyyəti məhz bu strateji məsələlərin həllinə yönəldiləcək.
Qlobal məlumatların sinxronlaşdırılması şəbəkəsinin (GDSN) üçüncü versiyasının mayda gözlənilən buraxılışının əhəmiyyəti vurğulanıb. Bu versiya məhsul haqqında daha müfəssəl məlumatın verilməsini təmin etməyə, məlumatların keyfiyyətini artırmağa və bazara lazım olan həllərin meydana çıxmasını sürətləndirməyə imkan verəcək.