2024-cü il oktyabrın 14-dən 17-dək Avstriyada (Vyana şəhərində) «GS1 in Europe» təşkilatının regional forumu keçirilmişdir. 45 fərqli sessiyanın təşkil olunduğu forumda 57 ölkədən 600-dən çox nümayəndə iştirak etmişdir.
Forumun plenar iclasında «GS1 in Europe» nın prezidenti Jan Somers çıxış edərək, 2025-ci il üçün prioritetləri və planları açıqlamış, dörd əsas məqsədi vurğulamışdır: dövri iqtisadiyyata keçid üçün sektora dəstək vermək, şirkətlərin növbəti nəsil barkodlara keçməsinə kömək etmək, sektor üçün etibarlı tərəfdaş olmaq, əməkdaşlıq üçün etibarlı platformanı təmin etmək.
Forumun yekun sessiyasında President & CEO, GS1 Global Office Renaud de Barbuat çıxış edərək, 2025-2030-cu illər üçün GS1-in vizyon və strategiyası haqqında məlumat vermişdir. O, bu dövrdə GS1 standartlarının daha geniş istifadə edildiyi sektorlar üçün standartların yaradılmasını sürətləndirməyin əsas diqqət mərkəzində olacağını qeyd etmişdir.
Forumda GS1 Azerbaijan İctimai Birliyinin İdarə Heyətinin sədri Vafa Əliyev, icraçı direktoru Səbinə Əliyeva və Əmtəə Nömrələmə Depozitariyasının müdiri Gülanə Rəsulova iştirak etmişdir.